في اخر ليالي رمضان و بعد ما سمعت دعاء ختم القرآن في الحرم المكي الشريف .....
انتابتني غصة .....دمعة اتحبست ف عيني و حسرة ملأت قلبي ...بدا الدعاء تأنيب و توبيخ أكثر منه دعآء ختم ....
كل اللي فكرت فيه كان ....هل أعتقت ؟! هل يجوز لي الاستمتاع بالعيد ؟! هل رضي الله عني ؟!
و في نفس اللحظة افتكرت تقصيري و تضييعي لهذا الشهر الكريم ....أيوة ازاي أعتقت و أنا ذنوبي من راسي لرجلي ؟!
ازاي أعتقت و أنا المذنبة المتكبرة ذات القلب المتحجر ؟! أعتقت !!!!! والله أنا نكتة !! أنا أحقر من اني استحق رحمة ربنا و مغفرته و عتقه ...أنا انسانة حقيرة ...دا أقل وصف
خلص رمضان و هل العيد ..ثلاث ايام من العذاب و التأنيب و التذكير بالذنب الفظيع ...ذنب تضيع رمضان
عادتي اني أضيع الفرص و أرجع أندم عليها ...عادة أدت الى الفشل المبقع ف كل تفاصيل حياتي ......أعتقت!!!هه
بس بيقولوا ان أظلم الأوقات بتبقى قبل الشروق ..دا اللي هو دلوقتي يعني ....احنا قبل الشروق أهو و الفجر أذن و حاولت أفتكر اي ايه من المصحف اللي هجرته من زمان .....بس ما افتكرتش غير "يا عبادي اللذين أسرفوا على أنفسهم لا تقنطوا من رحمة الله ,ان الله يغفر الذنوب جميعا, انه هو الغفور الرحيم"
الغفور الرحيم
الغفور الرحيم
الغفور الرحيم
فيه أمل يعني؟! في أمل بعد كل دا؟! بعد كل وعد قطعته و موفتش بيه ...بعد كل توبة و بكاء ما داموش غير يومين بالكتير... بعد استهتاري و تقصيري و ذنوبي ؟! في أمل ان ربنا يقبلني تاني ...
مفكرتش كتير الآية واضحة "الذين أسرفوا على أنفسهم" يعني أنا ....
قررت اني هتوب للمرة 978756454347697 ...بس المرة دي بجد ..أصل القبر ضلمة و مخيف ...شفته لما روحت أزور جدتي ربنا يرحمها و محتاجة معايا رفيق ..نور ...محتاجة القرآن عايزة يتقالي "اقرأ وارتقِ"
"فاذا عزمت فتوكل على الله"
و أديني بأشهدكم و أشهد نفسي و ربي ..أن ربي اقبل توبتي و انابتي اليك و اغفرلي و سامحني و افتح لي أبواب رحمتك
______________________________________________
و دمتم سالمين
No comments:
Post a Comment