لحظة حب :))

من فترة وأنا مروحة البيت كان بيجري ورايا ولد بيبيع نعناع مثلا 6 سنين.. بيقولي أي حاجة يا أبلة.. عايزين نستفتح

 بيكي.. قلت أكيد ده نسخة من أمه أو أبوه.. صعب عليا وفضلت أقول لو أديته فلوس هشجعه والكلام ده..

بالصدفة كان معايا حلويات وبالونات من عيد ميلاد أختي فأديتله اﻷثنين.. بعيدا عن الضحكة واللمعة إللي في عينه.. قررت أعمل حاجة مع إني كنت مترددة..

قلتله ممكن أطلب أنا منك طلب؟ قالي أأمريني؟ قلتله ممكن حضن؟

هو تقريبا مافهمش.. بس نزلت على ركبتي وحضنته لمدة ثواني كده و إديتله بوسة وقلتله أنت عارف أنك جميل أوي؟

كنت في اﻷول قرفانة من شكله بس بعد ماشفت نظرة عينه حسيت أد إيه اﻷولاد دي غلبانة وآخر حاجة ممكن يديهالهم أي حد هي الحب.. هو فرح بالحضن أكثر من الحاجة أصلا وقالي هو أنتي ساكنة هنا؟ قلتله آه.. قالي هابقى أجيلك أسلم عليكي.. مشيت وأنا مبسوطة أوي..الكلام ده كان من شهور.. إنهاردة الولد ده كان بيخبطلي على إزاز العربية جنب بيتي قالي إنت مش فاكراني؟ وأنا ماكنتش مركزة.. قالي أنا كنت بدور عليكي كل يوم عشان كنت جايبلك وردة بس دبلت وأمي مارضيتش تديلي أجيب غيرها بس أنا بعز حضرتك أوي وعمري ماهنساكي.. أنا عمر ما حد حضني قبل كده دي الناس بتديلي بالجزمة..

بغض النظر عن إن سنه طلع 10 مش 6.. الحب فعلا بيجيب حب وخير.. وإللى إحنا فاكرينهم كلاب فلوس ونصابين وحرامية في منهم قلوبهم أنظف من كثير مننا.. محمود إفتكر حضن وبالونة في وقت الناس مش بتفتكر لبعض سنين عشرة..

إللي زي محمود بيدولي أمل في الدنيا وبيدولي إيمان أن الحب دايما أقوى.. وخلاني أندم إني كنت قرفانة شوية..

أنا في حالة سرور :))